Misilittagalissuit akornannut inissipput

On 08/04/2013 by anuuna

Nanook tusarnaartitsisut / Nanook live, 5. april 2013. Asseq / Photo: Katuaq

Allattoq: Thora H. Nielsen

Nipilersoqatigiit Nanook Katuami tallimanngormat tusarnaartitsimmata paarlersuaq inunnik ulikkaavissimavoq. Nipilersorfissaat tungujortumik qaamanilinnik qullilersorneqarsimavoq. Annoraamineq qaqortoq filminik takutitsinermi atorneqartartoq annoraaminernit qernertunit marlunnit avatangerneqarsimasoq tusarnaartitsiviup tunuanut nivinngarneqarsimavoq, annoraamernit qernertut nipilersoqatigiit ilisarnaataannik Thulemandinik sakkulinnik titartaaffigineqarsimapput.

Nipilersoqatigiit sunik atuinissaminnik qanorlu pilersaaruteqarnerminnik tusagassiorfinnut oqaaseqanngisaannarput, taamaallaat oqarsimapput ilisarnartunik nutaanillu marlussunnguanik tusarnaartitsinerminni atuijumaarlutik.
Tupaallatsitsisarneralli tusarnaartitsinissaminnullu piareersarluartarnerat tusarnaartartut ilisimavaat. Tusarnaariat naatsorsuuteqarpasillutik pissangallutillu Katuami utaqqipput.
Silataa inunnik iserumasunik ulikkaarpoq, niviarsiaqqat allaat 12-it missaannik ukiullit iserniaraluarput inersimasunilli iseqatissaqarnatik. Appittussat nuannarineqaqisut iserniuttut paasinarsisippaat.

Angutit marluk qaqortunik annoraallit, nannup amiinik qarlillit, kiinaat qernertumik tanissimasut tamarmillu immikkut naalimmik tigummiallit nal.23.13 tusarnaartitsivimmut qaqipput tusarnaariallu tungaannut saallutik nasipput.
Nipilersugaq taallartaqanngitsoq aallartippoq nipilersoqatigiillu qilanaarineqaqisut tusarnaartitsivimmut qaqimmata tusarnaariat nuannattorsuanngorput.

”Kisimiinneq” aallarniutigaat. Taanna uanga Nanook-ikkut atortagaannit tamanit nuannarinerpaasaraara erinarsortorisartagaatalu aappaata Frederik K. Elsnerip inuusuttuaraalluni Danmarkimi ilinniartuulluni taalliaralugulu erinniaraa.
Taallartai nanertisimanermik ilaatigut imaqarput, soorlu oqaatsit kiserliorneq aamma sanningasoq atorneqarlutik, guitarernerali misigissutsinik sakkortuunik attuisoq qanilaarnissamik neriorsuisarpoq. Inuttaata uummatini attorlugu
erinarsormagu tusarnaartuulluni allatut ajornaqaaq, tassa kisianni tunniutiinnarluni.

– Erinarsortorisartagaasa angajoqqaavi tusarnaariat akornanniittut takuakka, qanoq nammineq meeraralugit tappikaniittut isigalugit tusarnaarianillu nuannisartitsisut takullugit tulluusimaarnartigaa, qanoq uanga tulluusimaartitsissagaluarpunga, arnaq saninni nikorfasoq oqarpoq.

Erinarsortorisartagaata aappaa Christian K. Elsner ualeq taanna sungiusartoq naapikkakku toqqusaarlunnerarami, unnukkulli tusarnaartitsilerunik ajornavianngitsoq saammarsaanikuuvoq. Aarimmi sunamita ajorpa, Christian K. Elsnerip erinnani
sakkortooq atorlugu”Timmissat taartut” kimilimmik appimmagu tusarnaariat kinguaariiaat arlallit tiguartiivillutik pissittaarlutillu qittatilerput. Musikvideoliaat tunuanni ingerlaarpoq qulliillu erinnap sukkassusaa malillugu qalipaatinik allanngorartunik ikittaqattaartinneqarput.

– Wow, ukiut ingerlaneranni pikkorissigaluttuinnarput, tupinnaq, arnaq 50-it sinnerlugit ukiulik nilliavoq pississaajutigalunilu qitilluni.

Nipilersoqatigiit nipilersornermik nuannarisaqarnerminnik takutitsilluarput, nuannaarnerat tusarnaarianut allaat tuniluuppoq. Tusarnaariannginnermi nuannarinnittuusimanngikkaanni tusarnaartitsisut naammata pinngitsoorani nuannarinnilersimanissaq
qularutissaanngilaq. Hans Rosenberg, tumerparpaartartutut aappaagu ukiunik 40-nngortorsiortussaq pikkugiivippara. Nipilersortartoq kulturikkullu nersornaasigaq Aasiammioq Ole Kristiansen nipilersoqatigisarsimavaa kiisalu Nuummiut nipilersortartut 80-ikkunni nuannarineqaqisut ”G-60” aamma nipilersoqatigisarsimallugit. Hans Rosenberg angutaavoq qeersaartoq, tumerparpaartilluni misigissutsini tamaasa atortarpai, misilittakkanilu ikinngeqisut iluaqutigalugit qanoq tumerparpaartoqartarneranik takutitsimmat tusarnaariat assut nuannarivippaat.

– Nuuk nuan, Nanook nuan! Arnaq eqqanniittoq nilliavoq.

Pattattoq Mads Røn nipilersoqatigiit pilersinneqarmatali aallaqqaataaniilli ilannguppoq. Nanookip isertugaataasa ilagaat. Angutaavoq nipaatsoq eqqissisimavoq tusarsaarpianngitsorlu. Tusarnaartitsinernili qiimmassaalluartarpoq aamma unnuk taanna kikkut tamaasa
tiguarpai, qitittarlunilu pississaartarami. Bassertoq Andreas Otte, Kalaallit Nunaanni nipilersukkat nuannarineqartut pillugit ilisimatusartoq, qanoq imaannaanngitsiginerminik aamma takutitsivoq. Nipilersortartuissuunera maluginngitsuugassaanngilaq, allaannginnami nammineq tillernini kisiviat malillugu appisimaartoq. Tiguartiivilluni pikkutsallualeraangami nujai takisuut pukusuata nalaanut qilersimasut siaangajattarput. Takusat tusaasallu pikkunangaarmata naammagittaalliortoqassappat tupinnassaqaaq. “Music and rhythm find their way into the secret places of the soul”, griikereq eqqarsaatersortartuusimasoq Plato ilaatigut taama oqarsimavoq, tassagooq nipilersukkap tarnerup isertugaataanut allaat angusinnaavai. Uani taama oqassalluni assut tulluarpoq. Nipilersoqatigiit erinniaminnik taalliaminnillu 24-nik atuipput, tamaasa iluatsilluaqalugit.

Nanook CD-mik nutaamik aappaagu saqqummersitseqqikkunik aatsaat Nuummi tusarnaartitseqqissapput. Nuummi tusarnaartitsereeramik aqaguani Nanortalimmut tusarnaartitsiartorlutik aallarput. Nanortalik tassaavoq Nanookimi erinarsortartut inunngorfigalugulu peroriartorfigisaat.

Nanook misilittagalissuit akornannut qularutissaanngitsumik inissipput. Ullorissat periarfissaasut arfinillit akornanni tallimat tunniuppakka. Tusarnaartitsineq assorsuaq torrallappaat,  qujanarujussuaq!

 

Nutaarsiassaq oqaaseqarfigiuk / Skriv en kommentar