»MAANGAANNAQ QITSERARNASI«

On 12/04/2013 by anuuna

Allattoq: Maren-Louise Poulsen

 

Taama eqqumiitsuliortoq Robert Holmene Facebookikkut titartakkani Buuarsikkut aqqutigalugit kaammattuuteqarluni oqariartuuteqarpoq.
– Aput aareerpoq, illoqarfiullu qeqqani pisulluni sumi tamani qiserpassuit naammattuugassaasarput. Erneralu Brugsenip eqqaatigoorluta tuniniaasorpassuaqartoq sangusaarluta pisuttariaqarsimavugut, qisikorsuit tummartoorumanagit, Robert Holmene oqarpoq.

Taanna isumaqarpoq inuit aqqusinermi qisertarnerat qanoq iliuuseqarfigisariaqartoq, taamaattumillu Facebookiminut titartaareernermi kingorna ingerlaartitaqalerluni.

– Inuit sumut tamaanga qisertarput, uagullu qisikorsuit tummartoortarpagut. Maanna peqqinnissaqarfiup TV-kkut paasititsiniaammik sakialluut akiorniarlugu ingerlataqarpoq, tassungalu tapersiillunga maangaannaq qitserartarnerup ajornartorsiutaanera paasititsiniutigalugu Facebookikkut qisuariaateqarpunga, Robert Holmene oqarpoq, neriupporlu tamanna oqallititsinermik kinguneqarumaartoq.

–      Facebookimi 2600 sinnerlugit kammaqaraanni oqariartuummik annissiffissatsialassuuvoq, taamaalilluni ingerlaannaq oqariartuut ingerlaartipallanneqarsinnaammat. Sakialluut akiorniassagutsigu politikkerit aamma qanoq iliuuseqartariaqarput, eqqumiitsuliortoq taama ilassuteqarluni oqarpoq.

 

 

Nunat ilaanni qitserarneq inerteqqutaavoq, paasisaagaannilu akiligassittoqarsinnaalluni.

– Isumaqarpunga qitserarnerit sakialluuteqalernissamut pisooqataasinnaasut. Tassami sakialluutilik qisersimappat, inuillu tummartoorpassuk nappaat tuniluussinnaavoq. Bakteeria ima sakkortutigisinnaavoq, allaat qiseraanni aputip qaani bakteeria uumasinnaallunilu tunillaasinnaalluni, eqqumiitsuliortoq oqarpoq, nangillunilu:

– Maajunnartua uaniippoq, qiseraanni, sioqqat pujoralaanniilersinnaagami anersaaraannilu taanna pujoralak uagut iissavarput. Maannalu Nuummi illoqarfik aputaariarmat pujoralattorujussuuvoq, Robert Holmene taama oqarpoq inuillu eqqarsaatissaannik tunerusuppai, maangaannarlu qitserartannginnissaat kaammattorlugit.

– Ajornartorsiut eqqummaariffigilertigut, naggasiivoq.

 

 

 

Nutaarsiassaq oqaaseqarfigiuk / Skriv en kommentar