Aleqap Dronning naapeqqilerpaa

On 15/04/2013 by anuuna
Allattoq: Maren-Louise Poulsen
 

 Oqaluttualiani oqaluttuarineqartarpoq kunngikkormiut niviarsiaqqamik piitsumik naapitsisut.
Tamanna aamma Uummannami 1975-imi ilumoortumik pisimavoq.

Tassami Naalakkersuisunut Siulittaasoq Aleqa Hammond taamani qulinik ukioqartoq, ukiullu
sisamat matuma siornatigut ataataa imaatigut ajunaarsimasoq, anaanaata meeqqat pingasut,
Aleqap qatanngutai marluk ilanngullugit perorsarpai.

Ukioq taanna Dronning Margrethe dronninngitut nunatsinnut angalasussaavoq. Uummannallu
borgmesteria Aleqakkunnut isersimavoq aperiartorluni.

Iserami Aleqap anaanaanut aperisimavoq: »Dronningi Uummannamut tikilermat Aleqa naasunik tunisisuutikkusukkaluarparput«.

Anaanaalu Ane Marie Johansen aperaaq: »Sooq Aleqa?«.
Borgmesteri ingerlaannarluni akisimavoq: »Ajorsartunnguamik tunniussisoqarusukkami«.

Ingerlaannarluinnaq Aleqap anaanaata borgmesteri anisissimavaa oqaluullugu ajorsartuunatillu
nallinnartuunatik, isumaqarami ilaqutariiullutik nikanartuunngitsut.

Ullut marluk qaangiummata ilaqutariit kommunemiit utoqqatserfigineqarput, Aleqallu ataqqinartorsuaq
Dronning Margrethe naasunik tunisussanngoramiuk aanaavata kalaallisuuliuppaa.

Oqaluttuaq taanna ANU UNA-p nalaatsornerinnaanngitsumik Aleqa Hammond ilisaritinneranik
allaaseriniarlugu apersoriartoramiuk tusarpaa. Oqaluttuarerusullugulu pissutissaqarnerarpoq.

– Oqaluttuaq taanna ukiut 37-it matuma siorna pisimasoq oqaluttuarissallugu tulluusimaarutigeqaara. Maanna 47-unik ukioqarpunga, Dronningerpullu naapeqqinnialerpara tamatumuunakkut arnani siullersaallunga Naalakkersuisunut Siuliuttaasuullunga naapittussanngorpara, Aleqa Hammond oqaluttuarpoq, pingasunngorpammi apriilip 17-ianni Ataqqinartorsuaq Dronning Margrethe issiaqatigisussaavaa.

ANU UNA nr. 14-imi juunip aallaqqaataanni saqqummertussami Aleqap ilisaritinneqarnerani malinnaagit.

 

 

Nutaarsiassaq oqaaseqarfigiuk / Skriv en kommentar